"سيد القطان" يكتب: حاقول لكم هنفض امتى الاعتصام !!

علشان نطمن شعبنا..
ونعيش فى جو من المودة.. والوئام
ولا ندى فرصة لحد غيرنا
يجرنا لدروب طويلة.. م الخلاف والانقسام
يا ولاد بلدنا.. حاقول لكم هنفض امتى الاعتصام!!
ونلم كل خيامنا.. ونسيب الميدان؟
لما اللى شعبنا يطلبه
يصبح حقيقة أكيدة.. مش حبة كلام!!
والشرطة تنزل كل شارع
تحمى أهلنا.. من كلاب السكة.. تملاه بالأمان!!

وعشان دا يتحقق أكيد
بنقول لكل المسئولين.. عن حكم مصر وشعبها.. الحر الأمين
اللى عانى م الفساد.. والقهر عشرات السنين
عاوزين محاكمة سريعة للمخلوع
وكل رموز نظامه.. م اللصوص.. والمرتشين
اللى باعوا أرض مصر الغالية.. بتراب الفلوس
للنصابين والأفاقين!!

ولأن موازين العدالة.. فى صفنا
دلوقت بنطالب يا سادة.. بحقنا
من اللى أهدر جهدنا.. وخان الأمانة
وبسبب إصراره عالتوريث.. طعن قلب الوطن
وقتل بسيف الغدر.. أحلامنا ومنانا!!
وخصنا حضرة جنابه
بحزمة من كل المصايب.. والمحن!
هوة اغتنى.. على حسنا
لكن بلدنا وشعبنا.. دفعوا التمن!!
ومهما يحصل فى البلد.. ماكانشى بيفكر فى شىء.. ولا ينشغل
إلا بمصالحه.. وبرياضته.. وبأناقته.. وثروته
وبكل أصحابه.. وأذنابه.. وأفراد أسرته
بالسيدة حرمه..
والمحروس جمال.. نجله اللى عاش يحلم.. يورثه عزبته!!
وكأن مصر وشعبها دى وسية.. لولاد حضرته!!

ولأنه واخد دكتوراه فى العكننه.. وفى المقاوحة.. والعناد
ولأن قلب سيادته معروف للجميع.. بإنه أسود م السواد
حاول بخبثه يشق وحدة صفنا
ويخلى أيام عمرنا.. بلون الرماد!
وف عهده غابت شمسنا
واستأسدت فى بلدنا.. تماسيح الفساد!!

ورغم كل جرايمه فى حقوق شعبه.. لكن
مش حنطلب من حماة الدولة ينحلوا فروته.. أو يسحلوه!!
ولا من صحابنا يركبوه على بغلة.. عرجا.. مزوقة
ويلفوا بيه وسط البلد.. ويجرسوه!!
لأ.. إنما بنقول لكل الناس هنا
حاكموه بهمه.. وبنزاهة.. وحكمه.. لكن
اوعوا تنخدعوا يا سادة بمظهره
وبدمعة الحزن.. اللى مرسومة ف عنيه.. وتصدقوه!!
لأنه كان تمساح كبير
وهبر كتير.. وغدر.. وخان!

وكفاية أنه قبل يكون دلدول.. ولعبة
فى إيد حبايبه.. الأمريكان!!
وكان بيتصرف فى مصر.. وأهلها
وكأنها.. عزبة أبوه!!

وعشان كده..
أركان نظامه ودولته.. فى ليمان طره
متشوقين جدا إليه
وحيعملوله زفة ضخمة.. تليق بحجمه
لما حيشرف حداهم.. والحديد حوالين ايديه!!

وفى الختام..
بنقول لكل المسئولين
عن شعبنا الواعى.. الأمين
اللى عانى كتير من التهميش.. وم التهبيش.. وم الحرمان

دلوقت مش آن الأوان..
علشان رجال ثورة يناير
اللى بيشاركوا الحكومة.. ينصفوه !
ويداووا جرحه.. ومن همومه يخرجوه
ويذكروا له وقفته مع ثورته.. ويكرموه
ويرجعوا له حقه كله
م اللى فضلوا سنين طويلة
يمصوا دمه.. ويقهروه !!

ولما حتعود للبلد شمس الأمان..
ونعيش فى بهجة.. وف مودة.. و ف أمان
وقتها راح نمشى فورا.. م الميدان
وساعتها مش حيكون هناك.. أى اعتصام !!