اغسل أيديك من دمى يا جلاد
واتأكد أن البصمة مش موجودة ع السكين
رغم أن بصمة غدرك المعروفة للدنيا
مامحتجاش تترفع من فوق رقاب ميتين
الموت ميحصدش مية من غير آلاف مأجورين
الموت ميحصدش روح رياضية بتشجع
إلا إللى كان فى المدرج بصمة إيديك الاتنين
تلاتين سنة وإيديك بالدم متلوثة
كأن دمى اتوصفلك تشرب كمان سنتين
قهرك وموت الولد سرقوا البدن منى
ع الوش حزنى أتكى وأنا أتكى على مين
ع الوش بان الحزن اللى خطف منى
أحلى ابتسامة ولد مرسومة ع الخدين
وأنا والحداد والمدبحوين وأنت
وقفنا ناخد عزا وكان العزا صفين
وسألت أعزى ولا جاى أخد عزا قلتى
العزا والدمعة نزلت من عينيكى المخنوقين
ما هو كله أهلى أن كنت جاى تعزى أهلى
وإن كان زمالك برده يتعزى وحزين
والكوره طول عمرها ما اتلونت بالموت
وكبيرها صفارة حكم أو يتحدف طوبتين
فلما تحصل مجزره تبقى أكيد متدبرة
ما هى مصر بقيت مصطبة للمخلوعين
ما هى مصر بقيت مصطبة للبلطجية والرعاع
والترمادول والبركينول والبرلمان والبرطمان والمسطولين
وأنا جاى أعزى يا أغلى أم فى كل دم
أنا جاى اعزى الشعب فى وجود مسئولين
فى أيدين تملى بترتعش ساعة القرار تأخد قرار
ولأمتى نفضل فى انتظار متحطمين
يا مصر هدى المصطبة وبطلنا لعب
ومهما يلعب فى الوطن مش مهزومين
أصل اللى حافظك فى السما قال
أدخلوها بسلام آمنين
حادث بورسعيد الذى قتل فيه مشجعو الأهلى
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة