د.هانى أبوالفتوح يكتب : 11 فبراير يُومْ العِيدْ !

سَبتْ بسبتْ بسبتْ بسبتْ
وبكرة تعدى سنة بالظبط
سنة من فجر سنة من ثورة
بس خسارة مصر الطاهرة
بعد السنة ......
عايشة بدون ظبط وربط
.....................
زى الليلة من سنة فاتت
قعدت أتذكر فى المواعيد
زى الليلة .. كنا بنحلم
يطلع بكرة بفجر جديد
زى الليلة .. كنا هناك
وسط ميدان نستنى العيد
نقول هيوافق .. يبعد عنا
وللا يسافر .. يمشى بعيد
نقول يتنحى .. تصبح جنة
بس الخوف كان جوانا
نخاف يخدعنا !!!
يطلع لينا بفكر جديد
وقفنا نفكر ... !!!
وسط النار الحلم بيكبر
بس الخوف إزاى يتغير
30 سنة عارفينه عنيد
...................
وإحنا بندعى قلبنا حس
كان كل الحلم فى يومها
يمشى وبس .....
آى و الله.. يمشى و بس
لكان تفكيرنا أخد التار
ولا تفكير فى شهيد أو حبس
ولا فكرنا مين فى السجن
ولا فكرنا فى أكبر لص
ولا فى فلوس ترجع لينا
ولا عاوزين ملايين يدينا
كل أحلامنا.. يرحل يبعد
يبقى كفاية فك النحس
بعد العصر.. الله أكبر
شُفنا نجوم فى السما بتنور
شفنا الفجر.. قبل المغرب
شفنا نهار.. شفنا الشمس
....................
بعد المغرب وصل الرد
قالوا اتنحى وسافر شارم
قعدنا نغنى ونحضن بعض
كلنا كنا نطير م الفرحة
ليلة هَنا دى وليلة السعد
وروح الشهدا كانت بينا
واقفة ترفرف ماسكة الورد
والأعلام حوالينا تزغرد
بعد الْمُر هنحصد شهد
....................
كان حلمنا.. نبدأ حرية
نعيش بعدالة نعيش بالحب
كانت مصر كلمة كبيرة
بتحضن فينا وجوة القلب
قلب الطفل الطاهر لسه
لا له فى الحقد و لا فى الكدب
و لا كان يومها
مين ثوار؟ ومين أحرار؟
ومين أنجاس ومين أطهار؟
ومين هنحطه فى وسط النار
ومين هيموت وناخد التار
ومين هنشيله فوق الراس
ومين هَنْدُوس على راسه نِكَبَّر
الله أكبر.. الله أكبر
ومين هنقول دا بطل مغوار
.........................
ألف خسارة.. وقت النصر
كانت أكبر كلمة.. مصر
مصر يا مصر تعيشى يا مصر
شوفوا دلوقتى وصلنا لفين؟
بعد السنة وسبقنا العصر!!!
.......................
طول السنة.. جمعة وملايين
وخطب نازلة وطالعة تقول
والإيد الواحدة.. بتتفرق
خمسين حزب ودق طبول
وما بين عسكر والثوار
كام إضراب على كام مقتول
وكام فى شوارع نهر الدم
شايفه يا مصر بتجرى خيول
..................
ألف خسارة...
واقفين نقتل بكرة بإيدنا
أى قلوب دى وأى عقول
كل أعمالنا وكل آمالنا
نعاند بعض.. نعادى فى بعض
نحارب بعض.. نقتل بعض
ومصير أمة للمجهول
تحيا الثورة اللى تخلينا
ما بين ثوار وبين كفار
و ثورة مضادة وسط فلول
تحيا رجولة.. بتقتل بكرة
باسم الثورة القلب الأبيض
بقى متوحش أصبح غول
عاوزين نبى ينزل يحكمنا
شعب ملايكة عاوز له رسول