فيسبوك
واتساب
بورسعيد يا شعب طيِّب = معدنك طاهر أصيل
الجراح صايبة قلوبـنا = والوطن كله علـــيل
والطيور لابسة الحـِداد = والدموع أنهار تسيل
والأسى مالى وشوشنا = والوجع هز النخــيل
مهما نبْعت فى العزاء = دا الكلام كله قلــــيل
بورسعيد رمز الكفاح = فى البطولة ماليه مثيل
فى المقاومة فى الفداء = التاريخ شاهد دلـــيل
بورسعيد يا أحلى ناس = صبرنا دا شىء جميل
الحكاية مش رياضة = فى السجون شيطان نزيل
دا الشر كله من طره = والفلول ليهم عمـــيل
شلة قاعدة بس ترسم = والكلاب نابها طويل
واللى حاكم من سريره = زارع التربة نجيل
خلا كل الأرض شوك = قال أنا وفوضى بديل
شلة عايزة بلدنا تسقط = عايزه شعب يعيش ذليل
شلة عايزة الضلمة ترجع = بس دا شىء مستحيل
مهما ريح الغدر هبت = الجبل إمتى يميل ؟!
صورة أرشيفية
