الليل دا ليه ..
هَمه تقيل ع القلب
مش راضى يفارقنا ؟!
يارب ضاقت أوى
وأنت القوى على بطشة الملاعين
مصر اللى كانت ملجأ الأنبيا
وواحة احبابك ...
مصر اللى جبت سيرتها ف كتابك ..
متشبعطة عينيها ف بيبان السما
بتنتحب وبتبكى عزم هزيل
شاكية إليك وحدك ..
كتر الهوان ع الناس
رافعة عيون الُدعا ..
وقلبها مكلوم
وانت مابتردش دعا المظلوم
مهما يصيبه الوهن ؟ !!
كل الجهاد ف الأصل علشانك ..
قبل الشرف والوطن
حاشا ان ذرة من جلال شانك ..
تسيب كِنانة الأرض يوم تُمتهن
خُلص الكلام منى يامولايا ..
لكن ف قلبى يقين
إن الرضا بالقضا بيخفف الشيلة
وان اللى فات من قلة الحيلة ..
كان ابتلاء ف سكة الرحلة ..
وان اللى جى رغم الوجع حتماً ..
حيكون بنفحة رحمتك ..
أحــــــــــــــلى .
