د. محمد صبرى يوسف يكتب: غول ورا التانى

قولوا للشهيد ينزل لنا تانى
وينزف لنا تانى
ويموت لنا تانى
أصل الطغاة سلسال واحد ورا التانى
ونثور وننزف حلم ..أزهاره لون تانى
وننتصرعالغول ونبُصله تانى
نلقى فى عين الغول عيون لغول تانى
قبل ما يجى النصر نثورعلى التانى

آه يا غيلان الجهل ما فى جهلكم تانى
إفتكَروا من تُخنهم مفيش تِخين تاني
الجنة من حقهم واحنا صراط تانى
عايزين يغطوا الهرم ويجيبوا نيل تاني
ويسرقوا حلمنا ونشوف مكان تاني
أهله وعشيرته شئ وإحنا شئ تاني

ما اتعلموش الدرس .. قالها التاريخ تاني
دى مصر زى الشمس فى نورها نور تاني
لا هولاكو صاب النور ولا اى غول تاني
شهيدنا ساب الحور .. ونزل لنا تاني
ينزف لنا تاني
ويموت لنا تاني
وليمان طرة يتقفل على غول ورا التاني