"جيكا ابن حضن القلعة والأزهر" قصيدة لـ"سعيد حامد شحاتة"

جيكا ما كانش يهودى أو كافر
جيكا اتخلق فنان بيعشق مصر
جيكا اتوهب للنيل فتى معافر
والنيل فرح بابنه ف صلاة العصر

******
جيكا:
الظاهر ان الذنب مش ذنب العيال
الظاهر ان الذنب ذنب المريله
ذنب القلم والتخته والكراسه ووقوع البلا
ذنب اللى شايلين الوطن
برجل ولوحه ومنقله
ذنب الربيع اللى اتزرع
ف عنيك قصيده وسنبله
ذنب المِقدّس والإمام
ذنب اللى واقفين فى الأَمام
ذنب اللى بيأدوا التمام
ذنب الديابه
اللى استحلّوا الدمّ فى الشهر الحرام
ذنب اليمام اللى انطلق
يهتف بروحك فى الخلا
ذنب اللى دايمًا يغلطوا ف تفسير آيات الزلزله
ذنب السؤال اللى انطرح
فجّر جميع الأسئله
الظاهر ان الذنب
ذنب الفرشه لما الفرشه
تتحول فى إيدك قنبله
******
"جيكا ما جاش
يا شعب ما تلومناش"
الحزن زىّ الموت عديم القلب
والقبر كلب بيخدم الأوباش
وبينفتح للطيبين فى الحرب
"جيكا ما جاش
يا شعب ما تلومناش"
واضرب ولادك وانسجم بالضرب
جيكا ابتسم لى ف غرفة الإنعاش
ورفض يعود رغم إنه فارس صَلْب
*******
جيكا ما كانش ف زمرة الكفّار
جيكا ابن حضن القلعه والأزهر
ابن النسيم والورد والصبّار
والضحكه والترنيمه والمظهر
هتغيب وروحك شبّاكين فى الدار
وعنيك بتزرع فلّ وبتسهر
هتغيب وعارفينك هتيجى نهار
ما انت اللى زيّك يختفى ويظهر