فيسبوك
واتساب
اتعودنا ليه ع الشك
وكل حياتنا صبحت لك
والأفعال صبحت معدومة
نصيحة فوقوا كفاية عك
****
مين فين غريب ع التانى
مين مجنى عليه مين جانى
المجنى عليه من دمى
ومن دمى كمان الجانى
****
جيب ورقة وقلم واحسب
أد أيه حجم الخساير
هتلاقى نفسك فى النهاية
على نفسك إنت كنت ثاير
****
شغل مخك فى النظرية
الخسارة اسمها مصرية
إوع تقولى إن التمزيق
ممكن يفرح قلب بهية
****
انسى خرافة التصنيف
فلان إخوانى فلان علمانى
التصنيف دا عبيط وسخيف
قادر يهدم أى أمانى
****
حب تراب الأرض وبس
ونزل عرقك فوق الزرعة
قارن بين الأرض الخضرة
وبين الأرض فى أضيق ولعة
****
وأطلب حقك وأوع تسيبه
بس بعقل بدون تخريب
والِ يعارضك امسك إيده
واوع تصنفه إنه غريب
****
اسمع فكره وسمعه فكرك
بكل بساطة بدون عصبية
لا تاخد رجله لا يا خد رجلك
فى سكة وحيدة اسمها وطنية
****
لكن تسمع ليه وتكبر
وهو يشد أيده ويفك
يبقى ها نصغر أكتر وأكتر
والِ ها يكبر هو الشك
****
الِ بيحصل فتنه خطيرة
والِ بيشعل فيها الشك
شايف أن اللعبة كبيرة
نصيحة فوقوا كفايه عك
