فيسبوك
واتساب
إن الربيع بييجى فمارس
وييجى مارس وميجيش الربيع
تييجى رياح وعفره وكوارث
فـ نبدأ نكِدب كلام المدارس
علمونا زمـان فِالمـدارس
قسمه وضرب وزائد وناقص
فنكبر نلاقى القسمه ظالمه
والضرب للى بالظلم حاسس
فـ نبدأ نكِدب كلام المدارس
علمونا زمـان فِالمـدارس
إن النيل لبلدنا باصص
فنكبر نلاقى النيــــل غــــريب
ويفصل مابينا الف حابس
فـ نبدأ نكِدب كلام المدارس
كانو زمـان فِالمـدارس
بينادوا عالبنات يا عرايس
فنكبر نلاقى الدنيا تانيه
وكل البنات قاعده عوانس
كانو زمـان فِالمـدارس
يرسموا الجوامع جنب الكنايس
فنكبـر نلاقى الفتــنــه نايمـــه
ونــــايــم معاها الف هاجس
فـ نبدأ نكِدب كلام المدارس
كانو زمـان فِالمـدارس
بيعلمونا ازاى نكون متفرقيين
كانو زمـان فِالمـدارس
بيعلمونا نِشف الخرايط
فنكــبر بنِشف الثــوابت
الجهل ثابت والفقر خالص
فـ نبدأ نكِدب كلام المدارس
كانو زمـان فِالمـدارس
بيقولو حدودنا يعنى الجيران
فلسطين يـمين وشمال السودان
فنكبر منلقى فلسطين فالخريطه
والســــــودان متقسم وبائس
فـ نبدأ نكِدب كلام المدارس
كانو زمـان فِالمـدارس
بيعلــمـــونا حب الرئيس
واللى يعارض عميل وخسيس
فنكبر نلاقى الثوره قامت
وكل اللى فات اصبح معاكس
فـ نبدأ نكِدب كلام المدارس
طلاب فى مدرسة - صورة أرشيفية
