فيسبوك
واتساب
مصر بيت وشراع وضلّة
مصر نخلة وغيط وقلّة
مصر تنهيدة مواطن
صام فى عزّ الموت وصلّى
يبقى مين بيحب مصر؟!
****
مصر صوت النقشبندى
كوز دُره وبجنيه سفندى
ضحكة الناس ع المفارق
ساندوتشين من "بشندى"
يبقى مين مفتون بمصر؟
*****
قلب عمران بالمحبة
مستكة وبخور وشبّة
نيل مزهّر ع المفارق
روح بتخجل تستخبى
يبقى مين اللى اسمه مصر؟
*****
صوت مخالف للديابة
كلمتين ضد الكتابة
وردتين وكتاب وفارس
ياللى عايزين مصر غابة
يبقى مين واقف لمصر؟
*****
تختة وضفيرتين وراية
آية وكتاب للهجاية
واللى حوّر واللى زوّر
باع وقابض م البداية
يبقى مين تاجر بمصر؟
تمثال النهضة
