"سيد القطان" يكتب: على الدبابة

هِزى الأوتار يا دبابة.. بنغم مجروح وحزين
نبهى كل السميعة.. صحى الناس النايمين
اعملى من كل وتر مدفع.. للى ودانهم من طين
وبلحم الناس الفقرا.. وعلى قروشهم عايشين
بكروش بالونات حتفرقع.. م التخمة ومش قانعين!!
دول والله وحوش وديابة.. مش ممكن بنى آدمين!!

وارفعى أنغام أوتارك.. صحى صحابنا الحلوين
اللى بيـسيـبوا عملهم.. وبـيـسرحوا فى الميادين
وعلى الدوسيهات الميرى.. دايماً آكلين شاربين
لو يوم احتاجنا لخدمة.. بيمشوروا فينا سنين!!
وإِنْ مرة شكِينا يقولوا.. نعمل لكو إيه؟!! دا روتين!!

وابعتى مِيت ألف مَلامة.. لِولادنا بتُوع المغنى
عَلشان أغانيهم هايفة.. وسخيفة ومَلهاش مَعنى
وقوليلهم يِرأفوا بينا.. مِ الدَوشة دِماغنا وَجعنا
والفن الراقى وظيفتُه.. يِطربنا ويِمتعنا

أما الدروس الخصوصية.. دى يا سادة مأساة حقيقية
بِسببها أصبحنا ضحايا.. ومقتولين من غير دِية!!
خَلِتنا بِعنا اللى حيليتنا.. وشَطبِت عَالميزانية
يا مُعلمين فِين ضَمايِركُم ؟!!.. فىِ إجازة على طُول يا عِنَية!!