شادى عبد المجيد يكتب: مبدأك على جمب ولا قدامك؟!

(أنا عندى مبدأ...) إنت قولت الجملة دى انهرده؟؟ طب قولتها امبارح؟ طب من يومين؟؟
أكيد قولتها قبل كده، أصل كلنا قولناها وبنقولها ولسه هانقولها، زى ما برده كلنا نسيناها وبننساها وهاننساها.. وللدقة يعنى.. كلنا بنعمل نفسنا ناسينها.

أحيانا كتيرة بنبقى ماشيين فى طريق وبعدين تيجى مبادئنا دى تقف أدامنا وتسد الطريق ووقتها ممكن نحطها على جمب شوية كده عشان نعرف نكمل الطريق.

زى المسئول الكبير.. اللى عنده مبدأ إنه ضد الواسطة والمحسوبية، ولما يتخرج ابنه من الجامعة ويلاقيه قاعد فى البيت من غير شغل.. وكل ما ييجى يعمل انترفيو لازم يقول مين واسطته الأول قبل ما يقول إيه مؤهلات... وقتها ممكن المسئول ده يحط مبدأه على جمب شوية.

وزى الموظف الغلبان.. اللى عنده مبدأ مايخدش رشوة، ولما يلاقى تكاليف المعيشة أكل وشرب ولبس ومواصلات ودروس وكتب وإيجار، كلهم أكتر من مرتبه.. وقتها ممكن يحط مبدأه على جمب.

والأب اللى عنده مبدأ إنه ضد الدروس الخصوصية، ولما يلاقى مستوى ولاده فى النازل عشان التعليم البايظ فى مدارسنا الجميلة.. وقتها ممكن أوى يحط مبدأه على جمب.

والبنت اللى عندها مبدأ ماتديش عواطفها وأحاسيسها إلا لجوزها اللى ماتعرفهوش ومستنياه ييجى، ولما ما يجيش بسبب الماديات الصعبة والظروف، وتلاقى نفسها بتكبر فى السن ووحيدة.. ممكن وقتها تحط مبدأها على جمب.

طب المشكلة فين؟
ياترى إحنا اللى بنختار مبادئ صعبة علينا؟؟ ولا هيا مبادئ سهلة بس الظروف أقوى منها ومنا؟

طب لو كنا فى بلد تانية وأحسن فى الظروف.. كنا هنعرف نحافظ على مبادئنا؟
بجد مش عارف الإجابة.

اللى عارفه كويس.. إن كل واحد فينا لازم يعرف يفرق بين المبدأ اللى ممكن يحطه على جمبه، والمبدأ اللى ماينفعش يحطه على جمب ويفضل أدامه مهما كانت الظروف.