بيتر بدوى يكتب: والله يا بلدى صعبتى عليا

والله يا بلدى صعبتى عليا

لما عنيكى جت ف عنيا

شفت دموع وألم وانين

دى دموع حزن؟ ولا حنين

ارجع ليكى وترجعى ليا

مشتاق ليكى مشتاق حضنك

لكن حضنك مليان بالشوك

محتاج حضنك .ضمدى جرحى

اتهنى واتحنى بدمى المسفوك

بلدى . بلدى وحياتك بحبك

نبضى يجرى جوا قلبك

بلدى.. وحياتك بحبك

بس خايف حبى ليكى

م اللى فيكى.. يكرهك

كل ما اجى اشتريكى

واشترى حقى اللى فيكى

القى مهرك مش ف ايدى

تعصرى الدم ف وريدى

تخنقينى .... وانا اللى ليكى

ليه يا غاليه ؟؟؟؟؟

عندى انتى غالية؟

وعند غيرى بترخصى

ليه أمالنا تبقى جنة

ولغيرنا ليه تتخصخصى؟

أسف يا أمى.. سامحينى

بإيديا قطعت شرايينى

يوم ما التقيتك بتنادى

وقفت وغمضت عينى

أنا مش حبيبك ولا ابنك

أنا كنت جلاد ف سجنك

ولما عنيكى جت ف عنيا

شفت دموع وألم وأنين

دى دموع حزن ؟ ولا حنين