زمان وأنا صُغيّر كانوا بيقولوا عليّا واد محترم ومخلّص، وكل إللى كان يشوفنى كان بيقول إن هو بيتنبّأ ليّا بمستقبل باهر !! والمفاجأة إن أنا لمّا كبرت، قالوا عليّا نفس الكلام !! ودى بالنسبة ليّا ولكتير من الناس مفاجأة، لأن الاحترام دلوقتى بيتفسّر بطريقة تانية خالص، إمّا على إنّه ضعف أو قلة حيلة!!
عملت المطلوب وأكتر عشان أفضل على هذا الحال، وكل إللى كان بيقابلنى كان بيقولّى "أثبت مكانك"، دا حتى لمّا كبرت شويّة ودخلت الكلية، وبقيت دكتور سنان "على ما تُفرج"، سمعت نفس الكلام من العيانين إللى اشتغلت معاهم!! اللى تقولّك "إنت مُعاملتك كويّسة حلوة أوى يا دكتور، خليك كدا واوعى تتغيّر"، وإللى يقولّك: إنت برنس والله يا باشا "، واوعى تركّز عشان مش هتفهم حاجة!!
مش مهم يتقالّك يا دكتور ولا يا باشا ولا حتى يا أسطى !! المهم إنّك تعمل شّغلك على أكمل وجه، وتعيش وسط الناس بما يُرضى الله، ولو فى يوم اتريقوا على طيبتك دى خليط طيّب واوعى تتغيّر، عامل الناس كويّس عشان يحبوك، لأن دلوقتى لوعاملت الناس وحش هيحترموك ولو عاملتهم كويّس هيطلّعوا عينيك !! مش أنا بس إللى بقول كدا، دى للأسف الحقيقة التى يعرفها الملايين !!
مش عيب إنّك تدوّر على مصلحتك، بس العيب إنّك تكون أنانى لدرجة تخلّى الجشع يعمى عينيك، وإنّك تتعالى وتتكبّر عشان الغرور بقى صفة فيك !! العيب إن الناس بالنسبالك تبقى مجرد أدوات تمشى على الأرض !! إللى تعرف تُنصب عليه..انصب، وإللى الفهلوة مالية عينيه..ابعد عنّه واجرى، لأنّه ممكن يتغابى عليك !!
عارف، أنا حاولت كتير أتغيّر وأكون واحد تانى غير نفسى، بس مقدرتش .. مقدرتش أكون حد تانى غير نفسى، وحتى لو الناس مش عجباهم طيبتى هفضل طيّب، عشان أنا كدا وحابب أكون كدا !!
مش المشكلة إنّك بتتعامل وحش، أو الناس بتفسّر طيبتك على أنها حاجة مش طبيعية، أو إن طموحك وأحلامك بالنسبة لهم أشياء عاديّة، ممكن يكون عفا عليها الزمن أو ممكن تفضل أبيّه!!
انس إللى فات وعيش حياتك زى ما أنت عايز، بس اوعى تخلّى الهموم تتراكم على كتفك، أو اليأس يملى قلبك، أو تخلّى حد يقتل طموحك، عيش حياتك وخلّيك مبسوك، وخلّى كل دا بما لا يُخالف شرع الله!!
يمكن المحترمين مبقاش ليهم مكان، أو يمكن ولاد التييت هُمّا اللى واخدين المكان، ناس محترمة كتير بقوا فى ذمّة الله، وولاد التييت ماسكين فى الدنيا بإيديهم وسنانهم !! حتى لو واحد منهم مات، فالمحترمين بيخلص منهم كتير !!
ما تستغربش لو لقيت قلّة ذوق منقطعة النظير، أو شفت كميّة تحرُّش ملهاش تبرير، كل دا بقى عادى بالنسبة لناس كتير، ما تستغربش لو لقيت بلدك مُتخلِّفة ثقافياً واجتماعياً وحضارياً، لأن كل حاجة مُعتمدة عليك.. ما تزعلش كتير، لأنها شِدَّة وهتزول، ولو مش مصدّقنى، افتكر قول الشاعر المحبوب:
إنما الأممُ الأخلاقُ ما بقيَت فإن هُم ذهبت أخلاقُهم ذهبوا
أنا كدا وهفضل كدا، هفضل مُحترم واللى مش عاجبه يخبط دماغه فى الحيط. الاحترام عندى كتير..تاخد شويّة !!
صورة أرشيفية
مشاركة
اضف تعليقاً واقرأ تعليقات القراء
مشاركة
