خالد عبد العال عبد الرحيم يكتب: تواضع الأحلام

أنا اللى علمنى الفشل تواضع الأحلام
أشوف تحت رجلى وأخاف من النظر قدام
لميت قلوعى ونمت على شطى
عارى من المجدعه وبخوفى متغطى
صحيت لقيت راسى فوق ندهتها وطى
يومها علا صوتى وخفت يفضحنى
خبيت فى قلبى الكلام وضربته بالأقلام.
*****
أنا اللى كنت فـ ضميرى حر وأبى
بـ أحلم أكون فى الحق زى النبى
لا يخاف ملام ولا حاكم غبى
زهق ضميرى من خنوعى فى الحقيقة وبكى
*****
سموكى يا مصر أرض المقابر وشعبك شقى
لا شجاع بيدفع ظلم عنك ولا عالم تقى
*****
بعد الفراعنة بقينا نتغنى
اللى بنى مصر كان صحيح بنا
وبقينا شعب الكلام كترت مواويلنا
صدفه حكمنا رئيس على فينا واتهنا
ولما قبض عـ الزمام باع فينا وأهانا،
دورنا على البنا لقى النهار منطفى
معرفش فين البلد سهانا راح مختفى
فحتوا يجيبوه مـ التراب لقيوه سليم فى الكفن
واللى على ضهرها مـ القهر صابه العفن
سعتها عرفت ليه يا مصر يومك طفى
وليه سموكى أرض المقابر وليه شعبك شقى،
******
أنا اللى كنت فى تاريخى حامى الحما
بـ أضرب بسيفى وأخش ميت ملحمة
لقتنى تايه مش عارف أضرب فى مين
وعدوى جاى مـ اليسار واللا اليمين