عشان فـرحــة هتحضن بنت
عشــان حلمى ببكـــــرة لابن
عشان لو م الحيـــاة استأذنت
ما اسيبهومش ف ايدين الجُبن
يعيشوا العمر ف مشقة
هاقول لأه
هاقول لأه
عشان الفُـقرا والمسـاكين
يحسّــوا بمعنى لوجودهم
عشان الرغبة ف التمكين
ماتلويش بالمـــرار إيدهم
وتانى يشحتوا الطقة !
ها قول لأه
عشـــان ولـىّ زمــان الخـوف
من الكهنــة وم الفـــــــراعين
عشان قدرت بصيرتى تشوف
نوايا الغـــدر ف المــــــلاعين
بزيف بتحلل السرقة !
ها قول لأه ..
عشـــــان الـدم مش لعبة
ف ايد الفُجـــر والإجرام
ولـــو تتهـــــدّم الكعبــــة
تهون من أجـل دم حـرام
يسيل بعصاية أو طلقة !
ها قول لأه
عشان الحـق مارجعشى
ولازم مهما غاب يرجع
عشـــان تانى ماينفعشى
أعيش مقهـور ومتوجـع
مابين الفتنة والغَرقة !
ها قول لأه
عشان قابض على جمرى
لا انا ملحـــــد ولا كــــــافر
مِفــوّض بالإيمــان أمــرى
ورافـض ضعـفى وباعـافر
بنِيِة مخلصة و صادقة
هاقول لأه ..
عشــان الجنة مش حصرى
لشيخ بيــــوزع التصاريح
عشـان أخلق وطن مصرى
يداوى آهــــة المجـــــاريح
ويحميهم من الفرقة
هاقول لأه
عشــان جـــدى الكبير أُسلـم
على إيد صُحبة ابن العـاص
قـــــرا ف شــريعته واتعــلم
وحفظ "البقرة" و"الإخلاص "
وواجه دنيته بجُرأة
ها قول لأه
عشــان العــدل مايفــرّقش
ف حكمه بين وزير وغفير
عشان على شعبنا مايلقيش
شيوخ الجهـــــــل والتكفير
باقولها بصدق وبحرقة
هاقول لأه
ها قول لأه
عشــان آفـة ف ضمايرهم
بتتدارى ف سِبحـة ودقـــنْ
وبيهـــم ولا مـن غيـرهـــم
هتفضل مصر عالية الشأن
أكم شافت عاهات طارئة
وصرخت ضدها لأه
ها قول لأه
عدد الردود 0
بواسطة:
هاله فتحي
و انا معاك
عدد الردود 0
بواسطة:
عبدالناصر احمد
الشعب قال كلمته
عدد الردود 0
بواسطة:
احمد ابراهيم
نعم للدستور
عدد الردود 0
بواسطة:
مصري بيحب مصر
انا مسلم