انزل، عَبّر، مانتاش جاهل
انزل قول لسيادة العاهل
دمّ ولادنا ماهوش بالسّاهل
انزل واكسر حاجز خوفك
خلّى العالم كله يشوفك
وانت بتروى النيل بحروفك
وبتكتب على سن سيوفك
مصر وطن حر ويستاهل
انزل عبّر مانتاش جاهل
الحريّه بإيدى وإيدك
رافض كلمة سيدى وسيدك
رافض ومركّز ومسالم
ومصمم على جمله تفيدك
انزل عبّر واصرخ جامد
واتوضى وعيش حرّ وصامد
وارفض واتبغدد واتلامض
وان سألك قول راضى وحامد
وأكيد مش محتاج لعبيدك
انزل واكتب ع الحيط نازل
واتكلم واغْزِل واتغازل
وإن طردوك بالليل م الجنّه
ضم إيديك وارفض تتنازل
انزل شايل روحك رايه
"اقرأ" كانت أوّل آيه
واحنا قرينا كتير ونسينا
إن الدّيب زى الحدّايه
انزل واكتب ع الحيط نازل
مصر خلاص مش ناقصه مهازل
مصر وطن حرّ ويستاهل
انزل، عبّر، مانتاش جاهل
