فيسبوك
واتساب
يابيه ماليش صالح بسياسة ولا دستـور
كل اللى باحلــــم بيه إنى اعيش مستور
لاكـــــلام ولا حوارات بيعــدلوا الميلة
إيه خدنا م الشعــارات غير هَم بالكيلة
وف آخــــر الليلة بقـــى حقنـــا مهدور
يابيه أنا شقيان وماليش ف شغل الدلع
والكتف م الشيلة قـرّب خلاص يتخلع
ولما قــالوا البلـــد محتاجة شُبــــــانها
أنا كنت أول وتد إتقــــوّى بيه ميدانها
ورجعــوا عايرونى بهدمتى الكستور
يابيه ح اقــولك إيه طعم الحياه مرّرْ
لا بلــدنا رجعتلنا ولا شعبها اتحــرر
مكتوبلنا نعافر ودى حكمته ف خلقه
بس الوجع كافر والحَمل خـان طلقه
والشمس مستكترة علينـا حبـــة نور
عـارف يابيه بلدنا تشبه لإيه ف القهـر
لست غلبانة ملهاش ســــــند ولاضـهـر
سرقوا رغيف عيشها وفاتوها مهزومة
ميت ايد بتهنشها وتسيبهــــا مكــــلومة
واما اشتكت حالهـا سجنوها ظلم وزور
يابيــه وعهــد الله أنا وطنى حُــــر بجــد
وباحبهــا لله من غير غــرض ولاقصــد
كل اللى باحلم بيه فرحــة ف عين الواد
وماتنكسرش عنيــــه لـباشا ولا أسيــــاد
ولايوم يحس فروق مابين عشش وقصور
وساعتها نبقى نقــول بلدنــا فيه دسـتور
الشاعر أشرف الشافعى
