فيسبوك
واتساب
ولا كـــل قولـة لأة تبقـــى خنــاق
ولا السكوت ع الزيف أدب وحياء
فيـــه شعــرة بين الطيبة والتفريط
لكن العبـــط ماسموش كرم أخلاق
صوتك كما عرضك مساسه بدم
والعـرض غالى ع الرجال ياعم
اطلق سهــام رفضك على الجُبنا
وُشق راس الأفعـــــى ولا تهتــم
صــوتك بيخزى جيش من الأنـدال
فإيــاك تبيعـــه بمــال ولا بِعــــزال
نور العيـون والـــدم كـــانوا التمن
دفعـــــوه عشــان تتعدِل الأحـــوال
صوتك ماهـوش بوابة للسـافل
واللــى بيفتكــرك عبيـط غافل
طبع الشِحاته مش ف عـوايدنا
ولو نموت م الجوع مانتسـاهل
صوتك ســند للحــــر والمَجدِع
اللى لاعمـره يخون ولا يخـدع
واللى قاسمته نومته ع الأسفلت
وكتفه كان وقت التعب مخــدَع
صوتك بيخسف ناس ويرفع ناس
صوتك كما كفـة ميـزان حسـاس
زى البصــر ف عنيك يبان عادى
لكن ماتوزنهوش جبــال من ماس
صوتك دفـا بيتك ف ليل البرد
وربيـع ولادك اللى زى الـورد
تدبل غصـونهم لو تفـــرط فيه
تقوى حصونهـم لوتأديه فرض
صوتِك ياخــالة هـو ستر الــــدار
إحساس أمان قصاد زمن غـــدار
فــــرح السنين الجاية لجل الضنا
وضحكة واصلة لحـد سابع جـار
صــــوتك يابلدينا دا تحويشتك
زهرة شقـاك وضِـل تعريشتك
لو كان عفى دنياك ح تحلا لك
وان ينطفى يملا المرار عيشتك
صوتك ضميرك لو يمــوت هتمـوت
وان بعته صعب تلاقى تانى شطـوط
حتعيش طـريد حضن الحيــاه والناس
عشان ساومت على الشــرف بالموت
صوتك ميدان العـدل رمز الجَلَدْ
رجْعّت بيه حـق اللى ياما اتجَـلَدْ
هتفت بيه هزيت عروش حكــام
قوم هـات بقى بكــره يليق بالبلد
الشاعر أشرف الشافعى
