خالد عبد العال عبد الرحيم يكتب: الصورة مقلوبة

اعدلها يا مصرى الصورة مقلوبه

كل ما يظهر أمل نحدف عليه طوبه

وانا بنادى بلادى

أفديكى بس ازاى

أعاديكى ماليه البلد والثروه منهوبه

واللى ناهبها فجر

واللى عايزها فخطر

واللى بيهوى المزايده ويشب فى الهوجه

اعدلها يا مصرى الصورة مقلوبه


*******

بامشى فدروبك وانادي

افديكى يا بلادي

يا تايهه عنى وانا

تايه فأحوالك

نفسى ألاقى بشر تعزف لموالك

نغمه لافيها نشاز ولافرحه مكسورة

نندم على كسرها ولاتنفع التوبه

أعدلها يا مصرى الصورة مقلوبه

******

الكل اسمه وليدك

عايش فخيرك وضلك

اللى بيزرع فى أرضك

واللى بينهش فعرضك

واللى بطيشه يضرك

وهوه قصده يفيدك

اعدلها يا مصرى الصوره مقلوبه

كل ما يظهر أمل نحدف عليه طوبه

*****

ملعون أبو الجهل

لكن ملعون أبو الخبث أكتر

والنيه مش كل حاجه

لازم نفكر ونصبر

ونميز اللى بيبنى واللى بيفنى ويدمر

اعدلها يا مصرى الصوره مقلوبه

كتير شافوكى مطيه

يا حره وأبيه

واحنا معاكى وبيكى

مانطاطى الا لباريكي

نفدى ترابك ورملك

من سينا للنوبه

اعدلها يا مصرى الصورة مقلوبه

كل ما يظهر أمل نحدف عليه طوبه