د. هانى أبو الفتوح يكتب: اشْرَبْ كَمَانْ وِكَمَانْ !

اشْرَبْ كَمَانْ وِكَمَانْ !


اشرب كمان وكمان
وافْرَحْ بَلا أحزان
اشرب وقول ما شْبَعْ
من جنة الإخوان
اشرب عشان كُرْسِى
عاش الرئيس مُرسى
وبقينا نقتل بعض
ونجيب لبعض جنان
إشرب كمان وكمان
..................
قَسَمُوا البلد نُصين
والعين بقتْ بالعين
والسن آه بالسن
وبلد واكلها طُوفان
اشرب عشان تختار
ما بين يا قُطْ و فار
واقلبها سودة .. نهار
ما بايِنْش لُهْ عنوان
..................
اشرب على مهلك
ولو اتقتل أهلك
إيه يعنى لو نهلك
أو داسنا قَطر كمان
نهلك عشان إعلان
نهلك لَ عَنْتَر بان
نهلك ونقتل بعض
ولا نوفى مرة بوعد
ولا نحترم دستور
ونبيع آيات قرآن
ونقول نحب الدين
ونكفر التانيين
ونحلل النسوان
ما تقولش بس أربع
ما شبعش من فدان
اشرب كمان و كمان
...................
بأكتب و أنا مكسور
بتْعَلُو ليه فى السور
يارب يا ستار
اكشف لنا المستور
نص البلد فرحان
قلب البلد مكسور
العيشة صعبة ونار
لا لقينا حرية
ولا شفنا فيها عدل
ولا حتى طاقة نور
اتفرقوا الأحباب
واتفرقوا الثوار
وشوارع التحرير
بقى بينها ألف جدار
بقينا نشتم بعض
وساعات نِكَفَّرْ بعض
حالفين ناخد بالتار
......................
إشرب كمان و كمان
وإفرح قوى يا شيطان
عملتها فينا
قسمت وحْدِتْنَا
ضيعت فرحتنا
أجمل ما كان فينا
آيات من القرآن
مكتوبة للعالمين
بتقول لكل الناس
يالا ادخلوا آمنينْ
دلوقتى فين الأمن
ولا ذرة حتى لدين
مابقاش لنا غير شُرب
ويفرحوا الحاكمين
نص البلد يغلى
ونص البلد بركان
وإنت تقول إشرب
نشرب لآخر العمر
ونعد فى الأحزان
ما إحنا اللى غاويين شُرب
اشرب كمانْ و كمانْ !!!