ماتقولش عليها مــاتت
ف الأحداث اللى فاتت
كام واحد طب ساكت
قبـل مايلمس حجـارة
ماتقـولش عـاملة عَملة
وتجيب م الزيف وتملا
اسمع حكايتهــا كامـلة
الظلــم ماهوش شطارة
خالتــك سلميــة عايشــة
مش ناويـــة تبقى طايشة
وهـتفضل برضه حايشة
عن أوطــــاننا الخســارة
خالتك سلمية واعية
جايز تتعــب وتعيـا
لكن خطوتها ساعية
لأحـلامهـا بجســارة
خالتـــك سلميــة لِســـه
بتحــارب كــــل خِسة
فاهمة الملعوب وحاسة
إيه مقصـود م العِبــارة
خالتك سلمـية يــامـا
حاولو الناس اللِمامة
يبقى طريقها الندامة
بالفتنة المستعـــــارة
خالتـك سلميـة مــوتها
ف خوفها أو سكـوتها
ياللى بتكتم ف صوتها
سيبهــا تشيل العكـارة
خالتك سلميـــة هاديـة
بتبـان ساكتة وراضية
لكن ضربتهـــا قاضية
لو حســـت بالحقـــارة
خالتــك سلمية باعهـــا
النــدل اللـى خدعهــــا
سابهــا بتنـزف وجعها
ودور ع الإمـــــــــارة
خالتك سلمية غول
لحظة ما تريد تنول
تقطـع كــل الديـول
اللابدة ف المغــارة
خالتك سلمية معنى
بيهـا العـــالم سمعنا
وح نستحمل وجعنا
مادام جايبة البشارة
عدد الردود 0
بواسطة:
راندة علي
ابدااااااع