صباحك ورد يا ضفيرتين على كتافى
باحبك بس مش عارف
...................هاضمّك واللا هتخافى
ومش عارف أطوف واللا
.............. الطواف محتاج بدن صافى
ومين علّمنى أوطيلك
..................... وليه سيفك كسر نافى
ومين طلّعنى من بابك
.................. ومين مشّى الملاك حافى
ومين علمنى أبوس قلبك
.................. وأنام على صدرك الدافى
باحبك بس مش كافى
................. إنى أعيش حبّيب
ومش كافى إنى أقف واهتف
............ وأموت وانا حاضن الدباديب
ومش كافى إنى أكون معدود
................على البشاكير وع القباقيب
باحبك فوضى ومطبّات
........................وآيه بتخلق الترتيب
وعود أخضر على العتبات
.............وصوت بينادى ع المشاريب
وشاعر جرّبك أوجاع
.....................وشعر بيكره التجريب
وجرح بيتفتح ويطيب
......................ويرجع يتفتح ويطيب
وسهم بيتحدف ويصيب
................صمام القبه فى المحراب
صباح الورد والحنضل
............صباح الفرحه فى الإضراب
صباحك ورد ومحبّه
.................وقصيده ومدرسه وكُتّاب
صباحك سجده فى الجامع
...................ودعوه بتطلب الإنجاب
صباحك فى الترع بشنين
................صباحك ع الطريق عنّاب
صباحك واد بيستنظر
..............جواب من تحت عقب الباب
صباحك بنت بضفيرتين
.................... وتُوكَه ومرْيَله وقبقاب
وكلمه بترسمك ملكوت
.................... وكلمه بتترسم سرداب
صباحك يا شفيفة الروح
................وطن ممنوع من الإعراب
