رامى محمد زين يكتب: طفل من أتوبيس أسيوط

ماكنتش أتصور قبل ما أركب النهارده الأتوبيس
إنه مش هيرجع منى غير شنطتى والكراريس
ماكنتش أتصور ده أنا كنت لسه إمبارح
بتخيل اليوم اللى هبقى فيه عريس
ماكنتش أتصور إن دى آخر مره أجهّز فيها شنطتى
وآخر مره أحط فيها سندوتشاتى وزمزميتى
ماكنتش أتصور إن دى آخر مرة أخد فيها مصروف
وآخر مره ألعب فيها بلعبتى
ماكنتش أتصور إنى مش هشوف تانى أهلى
ولا أسمع صوت أمى تانى بتندهلى
ماكنتش أتصور إنى مش هلعب تانى مع إخواتى
ولا أقعد على حجر أبويا أتفرج على ماتش الأهلى
ماكنتش أتصور إن بسبب الإهمال
أموت أنا وخمسين غيرى من العيال
ماكنتش أتصور إن لسه المسئولين
فاكرين إن دم المصرى حلال
ماكنتش أتصور ولا خطر ف عقلى
لكن إن كان ده حالك يا بلدى
بحمد ربنا إنى مت
وسيبتلك الدنيا من دلوقتى