"جبان مودرن" قصيدة جديدة لأشرف الشافعى

أنا الجبان المودرن
وبهلوان البلد دى من زمان خالص
ورهانى ع الكسبان مهما يكون وضعه
على أى حبل باجرى كالرهوان
وساعات بتطلب معايا أكروبات ع السِلك
طبع الندالة من زمان راضعه
وان شح يوم أو قلْ ..
أجرى اشتريه لو مِلك
انا أخبث إخوانى
باحسبها بالسنتى وبالنسبة
ولما بتغيّم ....
وبتيجى شبورة
تبوّظ الحسبة
أقدم التانيين واقول مانيش لاعب
واما تروق ويبان شعاع شمسها
أدخل ف وسط الجمع وألغوش
ولو قالوا لى رجعت ليه تانى
بعد اماكنت بعيد بتقرا وبتدعى
باقول ده طبع السياسة ف كل وقت وحين
وطبيعة المرحلة أوقات بتستدعى
***********
انا الجبان اللى مش شايف فروق واضحة
بين الــدِما والعما
عشان ماليش ف الوطن
نويت أقضى يومين وعشيرتى متنعمة
لا معارضة ولا دوشة
وباقول ضرورى يبقى فيه شِدة
وضرب بإيدين من حديد
لأى خارج عن قانون عزوتى
وسمح تعدى ف خياله رغبة ف مناوشة
وعشان ماترجع هيبة الدولة
باحس بالفقرا وبالمساكين
علشان كده ريحتهم م البلد
وخدتها مقاولة