مصر بلدنا طل وشوف
يا دنيا وتايهة ف 3 حروف
يا حضن وحصن.. يا جنة وسجن
وصحرا.. وشادوف
مصـــر يا شارع طوالى
آخره سد
حتى وأنتِ حاضنة نيلك
نبع خيرك.. خانقاه بسد
مصـــر يـا أم الشمس حامية
مصـــــر يـا أم الضلة حامية
فى بلدى أحلى ورد بلدى
صوت خناقه ف قهوه بلدى
مصــــر يا أم الإنسانية
فيكِ فقر وعشوائية
قوليلى ليه يا أم الكرم
كلنا بقينا ضيوف؟
ليه بنيتى بينا سور؟
ليه كرهتى إنى أثور؟
مش عارفة أنه لولا
ضربتى بفاسى ف أرضك..
كانت هتفضل ارض بور
خايفة عليا.. بتحضنينى؟
وحاسس إنك
بتقيدينى
محرّمة الأحلام عليا
ومعتمة ف عنيا الشوف
بموت فيكِ يا بلدي
وكل ثانية بموت
بموت فيكِ يا بلدى
وهفضل مستحلى الموت
ومستنيكِ تبتسمى
وتلبسى التاج..تترسمى
تنسى أحزانك وتنسى أحزابك
وتنسى اللى مزعوا يوم ف تيابك
وترجعى لينا..قمر بنور
إنجيل قرآن بينهم دستور
ترجعى مصر 3 حروف
نتحدى بيها وفيها الظروف
وتبقى حصن وتبقى حضن
تنادينا تلاقينا..فى أول الصفوف
صورة أرشيفية
مشاركة
اضف تعليقاً واقرأ تعليقات القراء
مشاركة
اضف تعليق
تم أضافة تعليقك سوف يظهر بعد المراجعة
عدد الردود 0
بواسطة:
مختار رزق
الله عليك ... والله علي امثالك . وتسلم ياابني والله
.
عدد الردود 0
بواسطة:
مينا إدوار
قصيدة رائعة تصف حال البلاد
قصيدة رائعة تصف حال البلاد
عدد الردود 0
بواسطة:
تامر محمود الشباسى
بيتر
طول عمرك فنان يابيتر الله ينور