"حكّامنا أشيك يا باشا ف بدلة الإعدام" قصيدة لـ"سعيد حامد شحاتة"

يا مصمّمين إن مصر وسيّه للحكّام
ومركّزين ع الوجع... وبتضغطوا بإحكام
دخل القطيع أرضكم خَدّام ورا خَدّام
واستنزفونا بقصايد غاية فى الإجرام
يا مشرّفين الوطن فى ملابس الإحرام
ومقلوظين العمم وبتدّعوا الإسلام
ومكّممين الغلابة بدبّورين ولجام
رصوا الكلام ع الورق واستنظرونا وسام
وسيبونا فى المفترق ننزف مرض وسخام
وننام فنصبح ونصبح مكتومين فننام
يا مسلّمين الركايب دفّة الأهرام
دخل القطيع أرضكم خَدّام ورا خَدّام
طاطا القطيع والتزمنا ومتنا بالإلزام
يا مصممين إن مصر هديّه للحكام
ما توتّروش نفسكم وتخططوا لقدام
وما توجعوش قلبكم بالرمز والإبهام
وما تخدعوش السيادة بروعة الهندام
وقولولوا لحظة ما يظهر فى المراية تمام
............ حكّامنا أشيك يا باشا ف بدلة الإعدام