أبوس إيدك...
ما تنسيش إننا ولادك شواشى الطين
تقاوى الصمت والصبّار
وثوّار الزتون والتين
وضحكة بنت بتحاول
تجيب للصبح عود ياسمين
وعيّل قلبه بيجرّب
يوزّع روحه ع الشطّين
وأُم بتبدر الأحلام
وأبّ بيتزرع قيراطين
وأنا وبطرس نسيج واحد
وريد مفتوح على القلبين
بنشرب شهد نيل واحد
ونعطش لو شربنا نيلين
أنا وبطرس خلاص واحد
وضمّة أمّ مش أُمّين
طابور الصبح صوت واحد
وأوّل حصّه حصّة دين
تراب الأرض مش جاحد
وقولى لناسك التانيين
أنا وبطرس بدن واحد
ومش ممكن نكون اتنين
