يوم ويوم .. قصيدة كل يوم.. شنطة راجعة لوحدها ع البيت

اكتب حروف كلمة " وطن " ..
وابعتها ف رسالة
لأى نمرة من اللى ظاهرة..
ف أسفل الشاشة
جايز سنينك تعتقك من قسوة التكشير
وتمِـن ببشاشة
والبِلية تجرى ناحيتك تلعب معاك
وتدخل السحب الكبير ..
ويانا .. على حبة دفا
ممكن تصفَى كمان على ..
شبرين كرامة
وتفوز بحبة إنسانية يجنبوك ..
طيش المخاطرة ف نطة الأوتوبيس
ومش بعيد لما تروّح للعيال
ويجْروا ع الباب يحضنوك
يشموا ف قميص الشقا ريحة الفرح
يطرح سنابل بركة ف الرغيفين
ويشد عزمك بكرة ف الطوابير
ولما تفرد جتتك..
تنعم بتعسيلة
وتعدى على خير الليلة دى بدون فزع ..
وتفارقك الكوابيس
اكتب حروف كلمة وطن وابعتها ف رسالة
فيه احتمال وارد..
الحظ يلعب لعبته!
وابنك وبنتك يرجعوا م المدرسة بدون امتهان
من غير عاهات
ولا تليفونات بتبلَغك..
إن الأمل قبل أما يبدأ رحلته ...
مرمى قتيل ع المزلقان
متنتورة منه الصوابع والإيدين
وإن اللى فاضل منه تتعرف عليه
شنطة وراجعة لوحدها ع البيت...
ف جيوبها كراسة وقلم..
وحلم رسمه طفل م الأموات
بينعى للناس الوطن..
وبيشكى للسموات!