مطلوب زعيم

تقول كلمات الأغنية التى يغنيها كاريوكى:

مطلوب زعيم، لشعب طول عمره عظيم، لشعب كان فاعل زمان لكنه هان.. حتى إنه ثار، بإيدين كبار وإيدين صغار، مفعول بيه بيقسموه ويفرقوه ويقطعوا فى عين اللى جابه واللى جاب أبوه علشان يموت أو ينتهى.

مطلوب زعيم لشعب حكامه خانوه، وتوهوه وغيبوه واللى انتبه منه وفاق غموا له عينه وكمموه، وسلموه فى المعتقل، لكلاب جعانة يقطعوه، لكنه رغم القهر قام زأر وزام، وفى أسبوعين زلزل حصون الجلادين هد النظام فوق راس جميع المفسدين.

مطلوب زعيم، يحمى الحقوق، يعدل ما بين الناس تمام زى الفاروق، ويكون حنين ع الفقير، وع اللى فاسد يفترى، يهدم على دماغه الشقوق، ويعلقه فى المشنقة أو يرفعه على رأس خازوق.

مطلوب زعيم، ما يقلش ع الخواف حكيم، ويكون كمان سمعه سليم يسمع لنبضة قلبنا، ويكون مكانه فى وسطنا، ما يعشش أبداً فى القصور والبعض منا للأسف ساكنين قبور، يشرب ويأكل أكلنا ويعيش كواحد مننا، يسمع لنا ويشور وياخد رأينا، وقت الخطر نتلم حواليه كلنا ونضحى وياه بعمرنا.

مطلوب زعيم، ع المسئولية يكون أمين، ويكون جرىء ويكون شجاع مش إمعة وحتة بتاع، يعرف يقول للظلم لأ، ويموت ولا يفرط فى حق.

مطلوب زعيم، نقدر نحاسبه بالقانون، أو نعزله لو للأمانة يوم يخون، لا يشترط الشكل إيه، لا يشترط السن إيه، لا يشترط الملة إيه، شرطه الوحيد يكون بشر، وباختصار مطلوب دكر.

وكما ترى سيدى القارئ، فإن مواصفات الزعيم الوطنى المطلوبة غير متوافرة فى الدكتور محمد مرسى رئيس الجمهورية الحالى، لذلك فإنه "مطلوب زعيم".