أحمد عبد الغنى يكتب: بلد منتهية الصلاحية

كومة لحم جنب قضيب القطر مرمية
قالوا جثة ولد أو بنت ماتوا الصبحية
أتوبيس وعدى قدام القطر فى لحظة حتمية
قضاء وقدر وعلى مين هنرمى المسئولية ؟؟
يشيلها غفير غلبان شغال من غير ماهية !!
أو وزير أو مدير ما هو كل قتل وله ديه
شالوا حسنى جابوا مرسى .. والحالة هى هية
ولا حد بيفكر فى البلد والناس الغلابة المنسية
ولا حد عاد يفكر فيها ولا بيحس بالآسية
وإيه يعنى عيل يموت أو حتى لو ماتوا مية ؟؟
ما أحنا لازم نخفف الشيلة ونقلل الحمل شوية
المهم النهضة والخير بتاعها يعم الجمهورية
والمهم الكرسى والعرش والحكم قصر الأتحادية
وتعيش ياريس ياحامى الحمى والبلد منتهية
ما عدش فى أمل .. وأنتهى تاريخ الصلاحية.!!
وأشوفك ياريس فى كارثة تانية .. ما هى جاية جاية..!!