مكتوب لمين الصبر
غير للمحرومين
وكمان مرار العمر ده
مكتوب لمين
كان نفسى
نفضل زى ما احنا صغيّرين
لعبة عروسة مكسّرة
ونلف كورة مدورة
كل الصحاب متجمعين
كان نفسنا
العمر اللى فات
يفضل معانا جنبنا
طول السنين
دلوقت لما كبرنا قال
سطر الفرح
مالهوش مكان فوق الجبين
يا ريتنا كنا صغيرين
يا ريتنا نفضل زى ما حنا
طيبين
مكتوب لمين الصبر
غير للعاشقين
والحب براية قلم
تطحن قلوبنا
واحنا قال متونسين
ما تقول يا صبر
المر ده واخد فرحنا
لحد فين
مكتوب علينا
واحنا مش عارفين
مش فارقه
ساعة بنتولد فيها
وساعة بالوجع عايشين
ما هو كل حى بيتوجع
والصبر قالوا للوجع تسكين
عايشين بنغزل فى الكفن
بين القبور ماشين
والدنيا دوامة قلق
حزمة ورق
حفنة دموع متجمعه فى العين
مكتوب لمين الصبر
غير للمطحونين
راسم خطوط متعرجة
بتمر بين الرمش والخدين
نفس الخطوط بيمر فيها
يحرق بالندم قلبين
فارد ايديه الصبر
شايل غربتي
بنشر همومى كل يوم اتنين
مكتوب علينا
واحنا مش عارفين
قضّيت حياتى ودنيتي
محبوس هنا
بين السلف والدّين
يا صبر ساكن
بين قصيدة كتبتها
ما تسيب لى فيها
للفَرَح شطرين
مكتوب علينا يا زمن
واللى انكتب ....
لازم تشوفه العين
صورة أرشيفية
مشاركة
اضف تعليقاً واقرأ تعليقات القراء
مشاركة
