راضى على الطهطاوى يكتب: رسالة عاجلة

مهما العيشه تضيق ويَّـاك = مهما حياتك تصبح مُرَّه
مهما تعانى تصرخ تشكى = مهما تهدد مليون مَـــرَّه
صوتك موتك كله دا عادى = عمره ما أثر فيهم ذرَّه
ياما قبلك فقدوا عزيمـــه = جابوا لناسهم خزى مَعرَّه
جاى دلوقتى أنت تهــــدد = فكرك كله دخيل من برَّه
اوعى تقوللى ظروفى عصيبه = مش لاقى من همى أى مَفرَّه
شايل كل هموم الدنيـــــا = نفسى أروح لأى مَجرَّه
مهما تقول ومهما تعيـــد = مش رايح أبدا ً تملا الصرَّه
كبِّر مخك واضبط نفسك = عقلك ويَّـــاك أثمن دُرَّه
لمَّا هتقطف بستان عمرك = ابنك هيعيد نفس الكـَـرَّه
مهما الدنيا تضيق حواليك = موتك عُمْره مايبقى مَسرَّه
وتبقى أكيد وحدك خسران = وتجنى بإيدك كل مضرَّه
لمَّا بإيدك تنهى حيـــاتك = تلقى جحيم الآخره مـَقرَّه
لو غايب قمرك عن ليلاليك = بعد الضلمه هتطلع غـُرَّه
بعد العسر اليسر معـــاه = هتشوف عينك أجمل قرَّه
اغزل توب الأمل بصبرك = خلـِّى عزيمتك خيط وكـُـرَّه
دوس ع الشوك وعدى طريقك = وازرع وردك بإراده حُـرَّه
ربك ضامن رزقك ليك = وأنت لسَّا فى حبل السُـرَّه