فيسبوك
واتساب
سوّاح وسارح فى الشوارع
وماشى فى الميادين
ومنين تخدنى الشوارع
ألاقى ناس تايهين
** ** **
ناس خنقها الزحام
وناس نهشها الغلا
ومن مرارة الآلام
يشيب شباب الولا
** ** **
ناس بتلعب قمار
وناس عيشتها مرار
والجاهل فى البلد دى
تلقاه صاحب قرار
** ** **
ناس نايمة فى قصور
وناس عايشة فى قبور
وناس من كتر الذل
جناحها بات مكسور
** ** **
ومع إنى ع الرصيف
ومش لاقى الرغيف
لكن هفضل مستنى
زمانك العفيف
** ** **
ومع إنّى ع السطوح
ومش ساكن فى قصر
لكن دايماً فى قلبى
وجوه الروح يا مصر
صورة أرشيفية
