د.محمد فؤاد أبوالعز يكتب: يوميات من دفتر دكتور مفروس

1- النواب من الأطباء المطحونين إلى بيشتغلوا، فى الحكومة هما هما إلى بيشتغلوا، فى المستشفيات الخاصة، وإن كان بياخد فى ال24 ساعة، فى الحكومة 40-90 جنيه، أو أقل بياخد ضعفهم، أو تلات أضعافهم فى الخاص، ..لكن ده بيهلكه وبيقتله وبيأثر على شغله فى التنين.

كل طلبنا إن الواحد يشتغل فى مكان واحد، شغل أدمى، ويديله دخل يعيشه، عيشة عادية، مش هقول متميزة، عشان يعرف يفيد العيان فى مكانه، ويرضى ضميره، ده صعب، وحقنا، ولا مش حقنا ؟؟ ..!!

2- الناس إلى بتقول على الدكاترة بياخدوا الألافات، حضرتك أيوة فيه ناس بتاخد الألافات، لكن دول لا يتعدوا 2 فى المائة، أو أقل، ودول الكبار من أساتذة الجامعة والمشهورين، إللى الغلبان بيروحلهم عياداتهم أم كشف 200 جنيه، لكن الغالبية العظمى من الأطباء والشباب، تحديدا فى وزارة الصحة والمستشفيات الحكومية عموما، حوالى 60 ألف دكتور، بيموتوا من كتر التعب يوميا، وبياخدوا ملاليم.. يارب نفهم ..


3- صحيح الطبيب بيعالج، وربنا هو الشافى، لكن أى واحد موجوع، أو مريض وربنا شفاه على أيد دكتور، يقدر يعرف تمن الألم ده كام، حاجه ما تتحسبش بالفلوس أبدا.
الصحة ما تتقدرش بتمن، فـما مفيش شيئ، أقل من وضع محترم للطبيب إللى بيحافظ على صحة الناس ويعالجهم ..!


4- كل واحد عنده عربية غالية وجديدة، و خايف عليها بيهتم أوى بالميكانيكى، ويزبط علاقته بيه، يخدمه أوى فى أى حتة عشان يزبطله العربية، إللى هيا حتة حديدة فى الأخر.
قارنه كده بعلاقة واحدة بالدكتور إللى بيعالجه، وبيقف جنبه فى محنته..!!


5- الناس إللى بتقول، إن الدكاترة بياخدو فلوس كتير وطماعين، ممكن حضرتك تقولى إحساسك لو جالك جلطة فى القلب، وأنت مليونير، ومالقتش دكتور قريب منك فى وقتها، يقدر يعالجك، أو يفيدك ويقلل خطر موتك، ولو بمعلومة بسيطة قرأها، أو عرفها. معلومة بسيطة، يعرفها دكتور، قد تكون سبب فى إنقاذك من الموت، الدكتور ده بيدفع الألاف مؤلفة، عشان يتعلم وبيسهر الليالى، ويستحمل مرمطة أساتذة الجامعة، فوق ما يمكن تتحمله أنت شخصيا، وفى الأخر مش بيلاقى أى مقابل مجزى مادى، أو معنوى، ولا كلمة شكر ...أفيقوا يرحمكم الله

6- ياما عيانين دخلوا على أيدى وقدامى الرعاية، بين الحياة والموت، وربنا وفقنا، وأنقذناهم من الموت بفضل الله، أغلب الوقت بييجى أهاليهم، يتخانقوا معانا مثلا عشان عاوزين يدخلو يشوفوهم، وبنتشتم وبنسمع كلام ما يتسمعش، وفى نفس الوقت بنفضل جنب العيان بكل طاقة، محدش بياخد عيان بذنب أهله ..ولما ربنا بيكرمه، ويخرج سليم ماشى على رجليه، وحتى أغلبهم ما بيقولش كلمة شكرا.
تخيلوا

7- أحيانا الحاجة الوحيدة إللى بتصبر الواحد على أنه دكتور فى مصر ..
أنه أكيد ربنا، هيجازينا خير على إللى بنعمله ...
والله ساعات بتبقى التصبيرة الوحيدة على الشغلانة دى ..


8-لو حضرتك رحت قسم الشرطة، وفيه حاجة مهمة وعاجله جدا، واتأخر عليك الظابط ربع ساعة مثلا، وزعقت وقلت أنتوا ولاد كلب، وبتاخدوا فلوس على قلوبكم قد كده، وحاولت تكسر القسم وتضرب العساكر .. ..
لما ييجى الظابط هيعمل إيه فى حضرتك ...؟؟؟؟
إنما الدكتور بييجى بعد كل ده، ويشوف العيان ويسعفه ويعالجه ..وعمره ما بياخده بكلمة قالها، أو حاجة عملها ..
قارن واحكم ..وده موظف حكومة زى ده تمام ..
لأولى الألباب لعلهم يتفكرون..!