رغم اللى فيها من عفن
محروسة فى كل أوان
النيل يعطر أرضها
تنجب عيال جدعان
****
تأسى ساعات إنما
قسوتها تنزف حنان
تبعد بعيد عنها
يومين تعود ندمان
****
سفينة قادرة تعدى
والعجز فى القبطان
قبطان جبان بيهدى
وبيرضى الأمريكان
****
قدم شباب الثورة
ضحية كالخرفان
والأم كانت دموعها
تحرك البركان
****
ورغم كسرة قلوبنا
مازال فى القلب مكان
لفرحة وضحكة صافية
تنشلنا م الأحزان
****
مازلنا واثقين إنها
عروسة الأوطان
حلوة وأيام فقرها
بتعلم الإنسان
صورة أرشيفية
مشاركة
اضف تعليقاً واقرأ تعليقات القراء
مشاركة
