فيسبوك
واتساب
الناس قصيدة بتنكتب وقت اللزوم
والأنبيا - ملهاش لزوم من غير بشر
الناس حجر
أقوى أكيد من البارود
لما الرصاص ينزل مطر
من جُند حاكم مُختَصَر
- ف كلمتين - الكفر دين !
الناس إيمان إن القدر
ف جيبه شايل ألف لون
م الأمنيات
بس انت تسعى ف دربهم
خليك مرافق حلمهم
لو حتى بشوية كلام
يترصصو فوق السطور
يملو المسارح والساحات
يتفرقو وقت الحروب
" مسموش هروب ! "
ده اكيد عشان يتجَمَعو لحظة عبور
لحظة بشر
والكون ف توب الانبيا
بيحارب القلب الغشيم
بيعاند الورث الغبي
بيحط خطوات القدر
على درب تاني مش ضلام
وانت الامام
اقرأ عليهم كلمتك
من غير علام
بس انت صدق قدرتك _ ع الابتسام
وقت المِحَن !
الناس شجن
اعزف ف ليلهم غنوتك
وتر القمر _ لو كان بعيد
هتسَمَع القلب البليد
بس انت عيد
الناس قصيدة بتنكتب ملهاش ميعاد
مفهاش عبيد
الناس قصيدة بتنكتب والدم سايل م الوريد
وبيتولد _ مليون شهيد
ما بيفهم القلب الغبي
ان كان ده قَوِة حلمهم
او كان بيقصف عمرهم
الناس دي اصلا مستحيل
والمستحيل يشهد لهم!
الشاعر مصطفى التلوانى
