راضى على الطهطاوى يكتب: التضحية والعطاء

تعالوا نضحى حقيقى بجد = نمسح لحزينا دموع الخد
قبل ما تدبح أنت خــروف = ادبح شر معاك ممــــــــتد
داوى جرح لطفل يتيــــــم = مش لاقى رحمة ف عيون حد
امنع رشوة تخش عليـــك = طوفان الظلم ما يعرف سد
خليك وردة تفوح بالخير = اخلص عملك عرق وكــــد
افرد وشك شيل تكشيرتك = دا الحزن يخلى حياتنا كبد
افتح باب قلبك للضحكة = دا البسمة الحلوة بتصنع رد
تعالوا نخلــِّى النية عمار = ونخلى عزيمة فينا تتشــد
نمحى كل شرور جوانـــا = حقد وكره وكل حســـــــد
نكبح كل جماح مطامعنــا = نبنى ضمير جوانا اتهـــــد
نصفح نعفو نسامح بعض = نلاقى صراع النفس خمـد
ونشق قلوبنا بنهر الحب = دا نهر الحب حقيقى جمد
زيارة قصيرة لجار وقريب = نلقى كل البستـــــان ورد
صالح بين أطراف متخاصمة = تلقى الشيطان غاب ولــبد
"عيد الأضحى "رمز عطاء = نزرع نلقى الكل حصــــــد
ياما أرامل عايزة القـــوت = وكل ما تتطرق باب يتصد
ساعد أم تكون محتاجـــة = ضحى بجهد ومال ويــــد
رايح تجنى بإيدك عمــــلك = وتلقى سعادة ماليها حـــــــد