راضى على الطهطاوى يكتب: تعظيم سلام

تعظيم سلام
لحكمك يا قاضى
يا سيدنا الإمام
يا حاكم عليهم
وشافى غليلى
يا واخد بتارنا
مطفـِّى فى نارنا
دا مصوا فى دمى
وباعوا فى نيلى
وشايف جنابك باعونا بكام..!
لأجل الكراسى لأجل العروش
باعونا بمجرد شوية قروش
سابونا بنغرق ويملوا الكروش
وخصخص فى عيشنا
وقصقص فى ريشنا
وإدُّوا اللى زوَّر عشانهم وسام
وقالوا لأمى
فى همك وغمك عبِّى وشيلى
وزرعوا النجاسة فى أرضى وجيلى
وحطوا علينا جميع اللئام
يا سيدنا الإمام
دا شلة عصابة
تعالب فى غابة
بتتعب فى قلبى تحيَّر دليلى
وخلوا شوارع عقولنا ضلام
تعظيم سلام
لحكمك يا قاضى
يا سيدنا الإمام
يا حضن الغلابة
يا صوت البرئ
دا سيفك بحق النزاهه جرئ
بعدلك حياتنا بتبقى تمام
يا سيدنا الإمام
احكم عليهم تانى وشدِّد
دا ثروة بلادى بايع يبدِّد
يسجن ولادى وليا يهدِّد
وينهب فى قوتى
أرفع فى صوتى
يفرض سكوتى
ويخنق فى جوفى حروف الكلام
يا سيدنا الإمام
وظيفتى خدوها لكل القرايب
وخلونا نسكن فى عشه وخرايب
وحتى الجاموسه مالاقيه الزرايب
وفرضوا الضرايب
علينا ولجام
يا سيدنا الإمام
سلبوا فلوسنا
وحطوا ف رصيد
وخرده باعوللنا
وقالوا حديد
وحزبك يا وطنى
دا فكره جديد
وقالوا جنيهك تبخر وعام
يا سيدنا الإمام
احكم عليهم تانى وتانى
دا باعوا تاريخنا وشالوا المعانى
وجابوا الوسايط
وخلوا العبايط
تقول الأغانى
تطبِّل تهبِّل
بإنى كبيرهم دا راجل همام
همومنا يا قاضى صرخة بتوجع
وعالم بيمشى واحنا بنرجع
يقولوا واخدنا بذكائه أمام
رضيعى بيبكى
باعوا حليبه
بيصرخ يعانى
يقولوا تمرَّد
دا طفلك مناضل ولازم يُشرَّد
عزيمته تُبرَّد
طموحه فى مهده
دا لازم ينام
طفلك مجرد
يرفس فى لفَّه
هياخد بكفَّه
ويُلعَن بتفَّه
يُسجَّل كجانى
دا طفلك أنانى
عايز يغير نظامنا ودفه
وهذا بيبقى أقل اتهام
ويسكن رصيف
ويشحت رغيف
ويُخرَم ويُفرَم
ويُحرَم ويُمنع
حقه ف علام
ويصبح فى حاله
تشيله كعاله
وياكل زباله
وتاكل ولادهم فطير وحمام
يا سيدنا الإمام
بيحرق وابورنا
ويقلع خابورنا
وشايف طابورنا
يقولك تلاحم ورمز الوئام
تعظيم سلام ياسيدنا الإمام
دا حكمك يا قاضى
وعدلك دا ساير
وروَّق فى دم الشهيد اللى فاير
وحقق مطالب لثورة يناير
وخفف علينا كتير الألام
تعظيم سلام
لحكمك يا قاضى
يا سيدنا الإمام
تعظيم سلام