نصر فتحى اللوزى يكتب : آمين آمين

عجبى على ناس كانوا من قبل الصـفر بادئين
كانوا بيحلموا يشوفوا القرش كانوا مـــطحونين
كان العيد يدخل عليهم من اللحمـة محرومين
كان الشتا بيفكرهم دايما من اللـبس عريانيين
كان الصيف يقول لهم اشربوا الهم ياعطشانين
اطماعهم خدتهم لسكة اسيادهم المـــلاعين
قالوا نمشى فى ركابهم مشيوا مع الشياطين
سرقوا نهبوا ظلموا شعب مصر ياولداه مسكين
سكنوا القصور والفلل بعد ماكانوا مش لا قــيين
كلوا بملاعق دهب وحاجات احنا مش عارفيــن
الاكل استوردوه مايصحش ياكلوا زى المساكين
وطازه يوم بيوم يوصل من بره مايحتاج تسخـين
والبواقى فى الزبالة نعيش واكلهم مش عارفين
ياما قضوا الليل فى سهر وعربدة طبعا سكرانين
عن ثرائهم يقولوا ميراث واهاليهم كانوا شحاتين
ودارت الايام عليهم بقوا مع اسيادهم مساجـين
وانكشف المستور لبسوا لباس الــذل مكسورين
لو سألت كم تساوى ليلة فى السجن يامسكين
يرد خدوا كل اموالى اخرج اشم حرية المسروقين
خسئت يالص خليك مع حبايبك احــفاد الشياطين
خلف الاسوار بتتقابلوا انتم سوا نقابة الغداريــــــن
عجبى على ناس مايملاش عنيهم الا تراب وطـــين
المريض يهاجمه المرض جيوبه خاويه يصاحب الانين
لو المودام بتاعة حضرته عايزه تركب رموش للعـــين
طيارة مخصوص من دمنا وطقم ضيافة على برلــــين
ترجع محملة من كل اشى لا جمارك ولا زفت الطـين
واذا حضرته كح مره يبقى لازم النوم فى قصر التـــين
التانين غضب ربنا عليهم باللى وصلوا له مش راضيـن
عدم الرضا خلاهم فى الشباب عواجيز بالهم كسلانين
كفاية عليهم فضايح مذلة وخوف فى السجن مرعوبين
الحر بيموت فى حياته مره وهمه كل يوم ميتين ميتين
أنا اعصر على دماغى لمونه يروح الصداع بلاها برلـين
وآكل من بينتا مش مهم اورديحى بالرضا هيبقى سمين
والبس جلابية وطاقية اخويا شلبى من صنع عمى امين
واحط ايدى تحت دماغى بعد العشا وانام نوم السلاطين
اصحى مع الفجر ساعة تقسيم الارزاق من رب العالمين
امامنا يدعى يحفظ لنا مصر والكل وراه بحب يقول آمـين
عجبى على ناس نسيوا ربنا وكانوا لمتعة زايلة فاكرين
نسيوا ان دعوة المظلوم لا ترد فما بالك بدعوة الملايين
يارب توب عليهم رجع حقوقنا سامحهم اذا اصبحوا تائبين
ومصر المذكورة فى القرآن خليها دايما فى اعلى عليين
اللى يفكر تانى بظلمها انت قادر يكون اسفل السافلين
ياريت تقولوا معايا فى ركوعكم وسجودكم آمين آمــين
***