رامى محمد زين يكتب: الجمل والجمّال

قال الجمّال للجمل بينا ع التحرير
نأدب إللى عمل ثوره للتغيير
بينا قبل ما تنجح وساعتها عمرى ماهفلح
هلبس البدلة الزرقا وإللى عملها هيغرق ف الخير
بينا وتعالى ف السكة على نزلة السمان
نفوت وناخد كارتّه وكام حصان معانا كمان
علشان عددنا يزيد وساعتها يا سيدى أكيد
إللى هيشوفنا هيخاف وهيقلب طوالى جبان
ووصل التحرير الجمل ويّا جمّاله
لقى حشود م البشر هناك ف استقباله
ولقى من فوقيه الجمّال بالخرزانه يمين وشمال
عمال بيضرب ف الناس اللى بتقابله وواقفاله
ووقفت الناس تدافع عن نفسها بشجاعة
واستمرت المعركة يجى كام ساعة
وقبضوا ع الجمّال وماخافوش زى العيال
وطلع عندهم ضد الجبن مناعة
وإتحول الجمّال للمحاكمة على اللى عمله
والناس قالوا حلال لو القاضى عدمه
لكن القاضى قال (الجمل إيه خلاه ركّبه وع التحرير وداه)
وطلع الجمّال براءة واتحبس جمله