حمدى يوسف يكتب: خمسه ف ستة بتلاتين

وصايه وصايه ..
راح الفساد وجتنى العصايه
ضربت بأديا شرخت المرايا
وشى ف مداها يشبه قفايا
أسمع حكاوى الولاد ف الحواري
أرسم ملامح طريق البدايه
أسمع كلام العجوز ف المزارع
أكتب بنفسى طريق النهايه
راودنى ف منامى شيطان الغوايه
حياتى بسنينها عايشها هوايه
أهلّب واقلّب وبيتى سرايا
بنيته بشقايا بدم الولايا
وكلب الوسيه غويته معايا
ندبح ونربح ونرشى بهدايا
نسلّك أمورنابحبه برادس
ودسته صبايا..
نعيمنا ف حياتنا ف كاس الولاية
نخطط ندبر بأدينا نمسمر
ف نعش النهاية
بنينا ف قصورنا مجالس دعاية
تزمر تطبل وتمشى ورايا
سميرنا ف حماها شيطان الغواية
نشرد ف قلب الشوارع ضحايا
ونرفع ف سعر الكلام للنهاية
حامينا حبيبنا قانون الجباية
إدفع تلاقى وتكسب حماية
نمشى ف طريقنا ندوس عالعباد
كإنا فراعنه ف وسط الرعايا
نسينا بخاطرنا أصل الحكاية
لشعب ف سكاته ناوى لنا النوايا
كاتم وساكت كإنه فدايا
يطمّع ف أهلى أزيد ف الخطايا
وأحرم بظلمى منح العطايا
لشبل ف شبابه ، وكل الصبايا
ف صلب القضية مجرد سبايا
وصاية وصاية
ضربت بغبائى كسرت المرايا