محمد حامد حسين يكتب: بحبك يا مصر

بحبك يا مصر وانكتب حبك على جبينى
ده أنا آخد تراب أرضك كحل على عينى
وأوهب عشان خاطرك كل عمرى وسنينى
بحبك يا غالية يا أم الأيادى مفرودين
بحبك يا وردة يا أم الروايح معطرة
ولو لفيت الكواكب من عطارد للمشترى
ما أقدرش أسيبك وأرجع عشانك مليون خطوة ورا
عشان أنتى الأساس واللى يعاديكى عليه ينداس
هنأمن حدودك ولو يوم زعلتى هانمسح أى دمعة تنزل على خدودك
فى حبك (نجيب) فى حبك (زويل) وجوك طبيعى بيداوى العليل
فى حبك يا مصر قالو مواويل لـ (كوكب الشرق) و(عبد الوهاب)
وفى أحلى الليالى يغنى (حليم)
بحب الليالى فى جوك حنان.. بحبك فى لمة فطار فى رمضان
بحبك فى رأفت وجمعة الشوان
بحبك فى لمة تصفى النفوس.. أنا باكتب لحبك مش للفلوس
بحبك وشايف فى ولادك أمل
وأخاف يحسدوكى ويعملوا لك عمل
بحبك سفينة وبإذنك يارب هاتعدى بينا لبر السلام
بحبك فى وحدة محمد وجرجس وأحمد وعيسى عشان كل نفس دنيئة وخبيثة تبطل كلام
عشان أى فتنة.. عشان أنتى بيتنا وفى وقت الصعاب ما أقدرش أفرق بين أحمد ومينا عشان إحنا أمة عشان إحنا لمة
بحبك فى فرحة عروسة بطرحة فى ليلة زفافها تحضن عريسها أول ماشافها
بحبك فى أم بحنانها تضم فى أحضانها ولادها
بحب الحضارة وأحب الفنارة.. بحبك فى بحرى وكمان فى الصعيد
بحب اللى عبر وفاكر الشهيد
بحبك وهافضل أحبك
عشان أنتى مصر