فيسبوك
واتساب
دخلوا الوزرا لحلف يمين
بصيت بعنيا شمال ويمين
الشعر الأبيض هيجنني
كله معدى العمر سنين
***
أما شبابنا يا عينى عليه
لاشفنا وزير ولا شفنا البيه
إمتى يا ربى نشوفهم وزرا
هما الوزرا أحلى ف إيه؟
***
لو فـ شروطهم شعر وأبيض
هصبغ شعرى ولونه أبيض
يمكن ينفع فـ نهار اسود
وهبقى وزير أو حتى مبيض
***
لما شباب الثورة وقاموا
هزوا الدنيا وبعدين ناموا
سابوا حقوقهم كله ياخدها
فـ بحر دماهم غرقوا ماعاموا
***
كِتْروا الورثة عليكى يا ثورة
دارت الدنيا عليهم دورة
طلبنا عدالة وعيش حرية
عدى العام وكأنه مناورة
***
يا شمس الدنيا لونك اتغير
أيوه يا وطنى هواك اتغير
ضوءك ساطع ريحتك حلوة
عمر الظلم تملى قصير
***
أول عيد بيعدى عليكي
حزن فـ قلبك غموا عنيكي
وانتى يا مصر ما هنتى علينا
شبكنا إيدينا ويا إيديكي
***
حلفنا بربى لَنِوْصل بيكي
أعلى مكان فى الدنيا دا ليكي
والحاقدين راح يسألوا ليه؟
قلبى وعمرى يا مصر شاريكي
مجلس الوزراء
