أنا مش سلمى ولا متظاهر
ولا ناشط بكتب فى خواطر
أنا طفل بيلعب بالنار
بتمشى فى وسط الثوار
أما حياتى بيها بخاطر
أنا ومعايا كل عصابتى
من مولوتوف نعمل أمطار
وبنعرف نفتح تشكيل
أنا أفراز الشعب الحالى
هما فى حالهم.. طظ فى حالى
ولما قمرهم ييجى ويلالى
بيكون لى فى الضلمة دليل
لا عرفت التختة ولا بقرا
بس أنا عارف شكل البقرة
والله مخدتش منهم لحمة
ولا شفتش فى قلوبهم رحمة
نفس الضحكة الرخمة الصفرا
ويقولو يحنن يا جميل
أما البيت كان كله جنان
مش لاقى فى الزحمة مكان
قمت هربت.. بعيش ف خنان
تحت الكوبرى أوف ميدان
مع شلة بتحب الكلة
أو معا ناس ف أيديها جوان
من أنفاسه أنا رأسى تميل
ليه تزعلو لما أمسك حجرة
أو أبقى سلاح أعدائكو الفجرة
دة أنتوا قطعتوا كل صلاتكو
بينا يا فرع وبينكو يا شجرة
أنا مواطن مقطوع من الشجرة
بتعامل على إنى دخيل
أنا طفل وما عشتش سنى
معرفتش أضحك أو أغنى
بصرخ يمكن حد سامعنى
يوجد لى ف الدنيا بديل
مشاركة
اضف تعليقاً واقرأ تعليقات القراء
مشاركة
