طارق عليان يكتب: إلى الغائب الحاضر جمال عبد الناصر

غايب ولكن فى الميدان حاضر
حاضر بقلبك وعقلك
وقت الصراخ والهمس
شفتك كما شفت النهار والشمس
واقف على راس الميدان
وقفة الفارس
شفتك حناجر ناس غلابة
بتنادى حرية
بتنادى للفجر يطلع
على خلق منسية
تسمع الدنيا صوتك
بعد انتظار الرد
يطلع ربيع الأمل
بعد الشتا والبرد
شفتك فى قلب الشباب
إخلاص ووطنية
النبض يصرخ مصر
أم البلاد هى
حلم الشباب فى الميدان
يرجع للوطن قيمته
نفس الحلم اللى إنت حلمته
شفتك بتغرس فى الشباب جوَّه الميدان
معنى الصمود
وسابقتهم جوَّه الميدان سبقوك
ضحكت من قلبك
نفس الحماس اتعلموه منك
إنت المعلم والمدرس
والتلامذة ميدان
شفتك فى دمعة أم
بتهادى الوطن أغلى ما تملك
شايلة صورتك فى الميدان
متونسة بحسك
صورتك وصورة ابنها
وجهين لنفس المسألة
شفتك بشاير نصر
بتطل من فوق الميدان
نسمة ورا نسمة