طارق عليان يكتب: ثورتنا مسـتمرة

رغم النفاق والكـدب
وتزييف الحقايق
ثورتنا مستمـرة
ولحد ما تحقـق هدفها
عيـش وحـرية وكـرامة
رغم الوشـوش الرمادى
الكـدب فاح منـها
وكـأنه شىء عادى
جينات وورثنها
فى الدم حبسنها
بالرغم من إعلام مزيف
بيغنى للسلطـان
مات الملك عاش الملك
وكأنه يويو بزمبلك
إيدين خفـية تحـركه
وكإننا فى مسـرح عرايس
العـرض داعب خيالى
الصبح إسلامى والعصر ليبرالى
أساتذة فى خلـط الـورق
والأكل فوق كـل المـوائد
بالرغم من إعلام مـريض
أو مسـتفيد
يتكـلم بلسـان الحـاكم
ويزَوَّق التخـاريف
يجـعل كـلامى خـفيف
ع السـاحر والأراجـوز
بيجـوز تـشوه صـورتى
بيجـوز
بيجـوز تغالط فى ملامح وشى
بيجـوز
لكـن ملامح ضمـيرى
فى كـل بيت وف كـل حارة
محفـورة ع الجـدران
وف تجاعيد الوشـوش
وف ألف وجـه بشوش
وف كراسات الطفل لما
يروح لمدرسته
ثورتنا مستمرة
ضد النفاق والكدب والتضليل
وتزييف الحقايق