وديع العلاوى يكتب: اللحظات الأخيرة

فى آخر أنفاسه
أحنى الشهيد رأسه
فم الشهيد المجيد
ضم العلم باسه
---------
ما بين دموع الحزن والأفراح
دارى الشهيد كل الجراح
نظر نظرة وداع وراح
مات الشهيد وعاش إحساسه
--------
ملقاش الشهيد حد من أهله
بلل شفايفه بميه ولا ناوله
درع البطولة ولفه من حوله
داس العويل رأسه بمداسه
--------
يا ميت خسارة علينا حتى الآن
لا فرحنا ولا نجحنا ولا مسحنا زمان
فاضله الآفاعى حيه زى م كان
كان الكلام خلع النظام من أساسه
--------
نم يا شهيد وإياك تتعجل
مفيش جديد هنا والمحكمة بتأجل
فاضل سنين عما الحكم يتسجل
إهدى كده وسيب الحلم فى نُعاسه
--------
فقد الشهيد عمره وخاب أمله
فينا يا مصر فى عصر كان أمله
يموت الظلم والظالم ومين عمله
فاسد وحاقد وخاين وقناصُه
--------
نام الشهيد ودمعته على خده
الدمعة شمعة نورت قبره
خافوا الشهيد لو انتهى صبره
لسه القلم باقى على كُراسه
--------
يا أم الشهيد إبكى إبكى ونوحى
إحكى وفضفضى يا أمه وبوحى
قولى كل الكلام لقلبى وجروحى
ولا تزعلى أنا ابنك وأنفاسه
--------
عمار