د.على جلال كاشف يكتب: ما تسلميش يا مصر ما هتسلميش منهم

ما تسلميش عليهم مش هما دول أهلك
لسه الدم ف إيديهم بالراحة على مهلك
ما تسلميش يا مصر
مين اللى قال يدن الفجر بعد العصر
بينهم ساعات وساعات
ولسه كتير حكايات
هتبان وتشهدلك
مين إللى يستاهلك
ومين إللى يستاهل الربط فى سلاسلك
ما تسلميش يا مصر مش همه دول أهلك
ما تسلميش يا مصر ما يغُركيش منظر
أبو بدلة ونص كرش طالع بيتمنظر
وأبو وش بألف وش آوانه يسترزق
وأبو جهل وجهله قاتله هو إللى بيفكر
وأبو ريحة فايحة طايحة بدمنا اتعطر
وأبو إيه وإيه وإيه
صاحى يحرق بإيديه
الصحرا والأخضر
ما تسلميش يا مصر ما يغركيش منظر
ما تسلميش يا مصر ما تسلميش على دول
منهم كلاب القصر ومنهم صحاب الغول
ومنهم وشوش باينه
شفافه مش خاينه
وهما الخسه ف عنيهم بتدارى كدب القول
هما إللى لسه يا مصر بيقلبوا المعدول
ويعزلوا الثابت ويثبتوا المعزول
وينصروا القاتل ويهزموا المقتول
مفروض أموت كام موته
وما كنش حدودته
يحلى التحليل عليها ويحطو ليها حلول
ما تسلميش يا مصر ما تسلميش على دول
ما تسلميش يا مصر ما هتسلميش منهم
إحنا اللى حافظينك وهما مين هم
لعب لسانك لعب
يا بو اللسان مُلعب
قلب الوطن مٌتعب
عملته ليه ملعب
ولا خوفت مرة عليه من جرح ولا من هم
ما تسلميش يا مصر ما هتسلميش منهم
ما تسلميش يا مصر مش مرحلة سلامات
ولا مرحلة تجريح ولا تصفية حسابات
ولا مرحلة تنطيط الكل فيها يزيط
وكل إللى يقول كلام ويعجب السامعين
على طول أوام نحطه فوق مستوى الشبهات
ما تسلميش يا مصر مش مرحلة سلامات
ما تسلميش يا مصر وإتخيرى الأخيار
لقينا بعد الثوره بيتولد ثوار
بيركبوا الموجه ويحطموا الأفكار
مابيفهموش فى الشعر وبيكتبو الأشعار
ما تسلميش يا مصر
ماتمشيناش الزمن من تانى بالمندار
ما تسلميش يا مصر وإتخيرى الأخيار
ما تسلميش يا مصر وبكره هيقولك
مين اللى كان ضالك ومين اللى كان ضلك
ومين اللى فاض صبره ومين اللى فاضلك
ما تسلميش يا مصر مش همه دول أهلك