فيسبوك
واتساب
وجاء فى البيان:
1. خلى خيار القبض عليك آخر حاجة.. حاول تجرى وتهرب.. من الذكاء ألا تعتقل من الأساس.
2. فى حالة التقفيل عليك ولا توجد طريقة للهروب استسلم حتى لا تصاب ويحصلك مكروه.
3. أول ما تركب العربية لازم تفهم حاجة واحدة مهمة جدًا.. إن فيه برَّه جيش من المحامين والمنظمات والقنوات الفضائية هاتنقل الخبر وها تدافع عنك مهما حصل.
4. بلاش خوف وفزع.. أهم حاجة ضبط النفس والهدوء فى الفترة الأولانية.
5. بعد ما يتقبض على شباب تانى ويبقى عددكم معقول ابتدوا قسموا الأدوار.. واختاروا واحد بس هوه اللى يتكلم باسم المجموعة ويتفاوض مع ضابط الأمن أو الشرطة العسكرية اللى فى العادة بيكون مش عارف يتصرف.
6. جهز رسالة على موبايلك لجبهة الدفاع عن متظاهرى مصر، وأى حد يقدر يوصل صوتك إن تم القبض عليك، وابعتها فوريًا أول ما تدخل العربية، لأنهم هياخدوا الموبايلات بعدها بشوية.
7. أول ما العربية تتحرك ابتدوا اهتفوا من الشبابيك لمصر والحرية، وخبطوا على جدران العربية من كل الجهات.. لو بتدفع تمن إنك اتظاهرت يبقى عرَّف البلد كلها إن كان فيه حاجة بتحصل وأنت فى السكة.
8. فى الغالب العربية هتلف من أماكن كتير لحد ما يوصلها تعليمات.. ما تنشغلش بالعربية رايحة فين، لأن اللى بره كلهم عارفين مكانك هايبقى فين، وهايتوجهوا عليه قبلك علشان يبتدوا إجراءات الدفاع.
9. فى حالة إنك عايز تقضى حاجتك.. فيه أزايز أو أكياس هاتلاقيها كده كده فى العربية.. والحل الأحسن إنك تعملها تحت عقب الباب من برة علشان تقرف الأمن اللى قاعدين فى خلفية العربية.
10. نظم الوقت ما بين الهتاف من الشبابيك وما بين الخبط وما بين لحظات الهدوء أثناء التفاوض.
11. لازم وأنت بتتفاوض تفهم الضابط إن كل المنظمات برة عارفة إنتوا فين وإنكوا اتقبض عليكوا.
12. أكثر من الغناء الوطنى لرفع المعنويات.. وخصوصًا إن الناس اللى ها يتقبض عليها غلط هيبتدوا ينهاروا وده دور اللى فاهمين يعرفوهم ويفهموهم.
13. فيه حالات هيتم فيها إلقاء المقبوض عليهم فى الصحرا مجموعات بعد ما يكونوا أخدوا بطاريات الموبيلات.. فى كل مكان هتلاقى مواصلات ما تقلقش.. قول للسواقين على الطريق إنك كان مقبوض عليك واطلب منهم يوصلوك.
14. أهم حاجة متفقدش الروح.. اليوم ده سبقه أيام كتير الناس نزلت فيها علشان بلدها، وانت مش أقل منهم وتضحيتك مش أقل من تضحيتهم.. خطوة على خطوة هنوصل.
15. لو رحت س 28 وده احتمال ضعيف التزم الصمت، وارفض التحقيق بكل الطرق، واطلب التحقيق مع النيابة العادية.
